政壇：神童凱琳棄醫科讀心理學
以十六歲之齡獲中大醫學院破格取錄嘅九優狀元何凱琳，本來有望做最年輕嘅醫生，但近日毅然轉系，九月起轉讀中大心理系一年級。唔少網友喺討論區議論紛紛，更有人爆料話凱琳過去幾年讀醫讀得好吃力，面對醫科艱深嘅課程，成績只屬一般。中大發言人尋日話，凱琳喺修讀內外全科醫學士課程同接觸臨床工作後，發現其志趣唔喺醫科，反而對心理學有濃厚興趣喎。
凱琳曾立志倣效「沙士英雄」、現任中大校長沈祖堯，懸壺濟世，點知依家先至話對醫科冇興趣，相信唔少人都跌晒眼鏡，事關投放喺佢身上嘅資源都唔少。據講凱琳經過同家人及中大醫學院院長霍泰輝商量後，正式決定轉系，仲唔介意由一年級生讀起，聽聞佢已投入心理學課堂中，適應得好快。
何凱琳放棄修讀咗幾年嘅醫科，轉讀心理學。