政壇：搞搞政：舊立會大樓11.1停用

立法會搬遷工作喺爭議中完成，象徵立法會舊大樓嘅歷史任務完結。立法會行政管理委員會決定，下個月一號開始，舊大樓唔再開放畀議員用，以便清拆舊大樓入面各類型系統，到下個月二十一號，舊大樓就正式交還畀政府。

一九一二年一月落成啟用嘅立法會舊大樓，本來係殖民時代嘅最高法院大樓，日佔時期一度被日軍用作香港憲兵隊總部，此後不時有關於舊大樓嘅鬧鬼傳聞。到咗八四年，舊大樓外部更被列為法定古蹟。八五年十月，舊大樓經過一年嘅改建工程，由法院轉型為立法局，沿用至今。

過去二十六年，舊大樓成為官員同議員針鋒相對嘅是非地，近年更變成田徑場，事關議員不時會衝去高官面前掃枱，或者喺自己個位掟蕉同膠樽，不過呢一切都會因立法會搬竇而成為過去。

雖然舊大樓關閉在即，但舊大樓外面嘅停車場會繼續開放畀議員泊車。話時話，行管會仲決定咗，唔會為舊大樓進行熄燈或關門儀式，大家想緬懷舊大樓嘅話就快啲手喇！