政壇：林公公6條1上內會受靶

今年有一個好日，唔少情侶都選擇喺嗰日拉埋天窗，就係下月十一號嘞，亦即係二○一一年十一月十一號，總共六個一，非常之易記。就喺呢一日，外號「人肉錄音機」嘅新任政務司司長林公公，將會出席立法會內務委員會特別會議。佢選擇喺好日上內會，唔通係想畀議員鬧少啲？

按照慣例，政務司司長一年會現身內會特別會議兩次，就住特定議題同議員交流。立法會議員早就向新官上任嘅林公公提出，希望佢可以上多幾次內會，但遭婉拒，佢只係答應維持前朝安排，即是一年兩次呢個規矩，極其量有需要時先至再算。

所謂好嘅開始就係成功嘅一半，林公公首次以司長身份上內會，梗係要做得好好睇睇啦，可能因為咁，佢選擇咗今年嘅好日上去。我哋查過通勝，嗰日做好多嘢都適宜，只有蓋屋同治病兩樣嘢要避忌吓。不過，好多時謀事在人、成事在天，一件事情能唔能夠成功，好睇當事人有冇做好自己。

應修補與各黨派關係

就好似林公公嘅上手唐唐咁，佢做政務司司長時都出席過唔少內會特別會議，不過令人印象最深刻嘅，莫過於○八年六月二十號嗰次，佢就住漢普頓酒店事件回應時，爆出咗街知巷聞嘅「條條fing」論，事後成為全城笑柄。

其實林公公已經先天不足，佢做政制及內地事務局局長嘅時候，搞親嘅都係極具爭議之事，唔單止同泛民主派埋下唔少積怨，仲令佢民望一直喺低位徘徊，依家升職做司長，兼顧嘅範疇多咗，好應該花多啲時間同心機，搞番好同立法會各黨派嘅關係，如果唔係，揀幾好嘅日子上立法會都冇用，佢真係要好自為之喇。