騙徒與時俱進 警方抱殘守缺

「猜猜我是誰？」嗱，如果閣下以為呢個只係電視有獎遊戲節目，咁就要打醒精神嘞，事關早前鬧到滿城風雨嘅電話騙案，好多受害人就係受呢句話蒙騙，被不法之徒有機可乘，假扮親友騙財。

講起電話騙案，真係一波未平，一波又起。繼「猜猜我是誰？」騙案潮後，「假綁票」電話騙案又隨之而起，肆虐中港澳台兩岸四地。警方拘捕示威者手到拿來，阻撓記者採訪孔武有力，但係講到打擊電話騙案就冇心冇力，要將不法之徒一網打盡，正如「一哥」曾偉雄嘅名句：簡直係天方夜譚！

嗱嗱嗱，太一叮唔係長騙徒志氣滅警隊威風，事實上，以現時嘅兵捉賊遊戲規則，兵根本唔夠賊玩。唔明嘅話，等太一叮講解下啦。呢，曾偉雄自爆警隊捉賊手法落伍，新一代騙徒相當狡猾，識得利用IP電話以假號碼隱瞞身份，喺甲地打出詐騙電話，乙地收贖款，丙地匿藏，真正係玩到警方氹氹轉。

咁啦，去片睇實例。本港今年頭三季破獲十八宗跨境電話騙案，拘捕十四名持雙程證內地人及三名台灣人，佢哋都喺香港境外打電話畀受害人，但就利用本港交通便利，同埋四地執法上存在差異，揀喺香港收贖款，實行跨境犯案。曾偉雄自首補鑊，坦言警方現時採用嘅雙邊合作通報機制有需要檢討咁話。

禿鷹低頭認衰都算奇聞咯，大家知啦，佢老哥一向以作風強悍見稱o架嘛。不過咁，認低威都未必遮到醜，本港電話騙案受害人咁多，警方只拉得十幾丁友，明顯破案不力。對電話騙案呢類犯罪集團，內地一拉就幾十人，相比之下，香港認真失禮。

話時話，警方的確幾瘀o架，做賊嘅都識得與時俱進，諗到利用新科技，橫跨三地甚至四地作案，掩人耳目，而做兵嘅反而抱殘守缺，仲停留喺雙邊合作層次，落後於形勢，試問點夠騙徒玩呢？警隊反應慢三拍，唔怪得匪徒有恃無恐，電話騙案禁之不絕、愈演愈烈啦！

講起都好笑，警方打擊跨境犯罪嘅辦案手法十年如一日，打壓新聞自由手法就求新求變，更換通訊系統截斷傳媒消息來源唔夠喉，仲要無所不用其極，阻撓記者採訪，最近更接連被踢爆瞞報重大案情添。警隊自稱專業正直，睇嚟呢個先至係本世紀最大騙案喎！

咁講啦，知恥近乎勇，曾偉雄肯認衰檢討雙邊合作模式，唔講「騙徒其實係黑影」嘅謬論狡辯，對佢嚟講算係一個天大進步嚟o架嘞。咁啦，唔該一哥坐言起行，快快捉拿電話騙徒歸案，當係將功補過囉，叮！