SUN世代：「花心」80後 掀起寶石熱

突破自己，需要機遇，還有勇氣，楊永鏗（Henry）兩樣有齊。五年前，內地經濟剛熱，Henry剛畢業，沒人脈，沒經驗，卻自告奮勇做「先頭部隊」，為家族珠寶生意勇闖內地。面對不熟悉的行業和陌生的環境，這名浸過鹹水的「80後」毫不退縮，也不錫身，不但帶起內地的寶石熱潮，更為公司省靚內地招牌。這幾年的人生速成班，令這名珠寶門外漢搖身一變成為極具大將之風的珠寶專家。

出身珠寶世家的Henry，自小閱「寶」無數。「爹哋同媽咪都好鍾意珠寶，細個同佢哋去旅行，無論去到邊度，都一定行珠寶店。」父母愛珠寶，但對大男孩Henry而言，珠寶的吸引力始終有限，即使身為家中長子，亦未想過繼承家業，「因為鍾意數學，大學選科揀讀經濟，無諗過做珠寶。」

然而，人生路無法計算，人亦會改變。大學畢業後，Henry兜兜轉轉又回到珠寶世界。「○六年，內地經濟起飛，屋企人見內地珠寶市場有得做，問我有無興趣幫手。雖然我對珠寶無咩認識，但有機會點解唔試吓呢？」年輕、無經驗不是藉口，為表決心，Henry跑去修讀美國寶石學院鑽石文憑，為日後珠寶生意之路打好根基。

盼設計男士珠寶

笑言性格「花心」的Henry，樣樣都愛試。剛入行，由意念、設計、生產到零售管理，做珠寶的每個程序，Henry都做過，「我唔想一知半解，要學就學晒全部。」眼前這位珠寶界新丁，凡事抱着求學的精神，虛心學習，數年間就當上中國區分區總經理，「依家主要負責內地市場嘅零售推廣，一半時間都喺內地，雖然成日要中、港兩邊走，但有機會接觸客人，都好開心。」

工作雖然忙碌，但客人的稱讚令Henry愈做愈起勁。「公司曾經推出過一個頸箍，有即將出嫁嘅客人想喺結婚嗰日戴皇冠，所以我哋就將個頸箍改成皇冠。」經過Henry與同事們的努力，該名客人最終戴住皇冠幸福地出嫁，「客人滿意，就係我哋最好嘅回報。」

珠寶是女士至愛，為了解女客人的心思，母親成為Henry的揣摩對象。「媽咪好鍾意珠寶，有時都會睇吓佢鍾意啲咩款式，又會問吓佢意見，吸收靈感。」Henry笑言現時已患上「職業病」，「每次經過珠寶店，都一定會停低望吓；去睇戲或者睇show，都會留意主角戴咩首飾。有時朋友仲講笑咁講，同我出街都要戴番啲飾物。」

幾年間，Henry已經愛上這個行業，而他心中還有一個珠寶夢。「有時自己出席啲隆重場合，想戴飾物嚟襯吓衫，但除咗手錶之外，都無咩可以揀。其實珠寶男人都可以戴，但依家個市場好細，好少人做。所以我希望有一日可以設計出一系列男性嘅珠寶。」

Henry's Profile

現職：寶石城中國區總經理

學歷：美國寶石學院鑽石鑑定文憑

公職：中國人民政治協商會議委員、肇慶市委員會委員、滬港青年交流促進會委員。