政壇:搞搞政:立會新餐廳25元斑塊飯

立法會新大樓除咗採訪同保安安排搞到傳媒同示威者怨聲載道,其實包括議員、議員助理同秘書處職員亦有好多不滿,最切身問題就係冇啖好食。

立會行管會尋日開會,除討論進一步放寬新大樓採訪限制,另一個重要議程就係通過新大樓餐廳嘅承辦商,稍後會簽約,但最快亦要到明年初先正式營業。據聞餐廳嘅承辦條款好多優惠,承辦商只須承擔興建餐廳廠房、枱櫈同水電煤等開支,唔使畀租,而且一簽約就四年,唔知情嘅一定以為班議員又嘥公帑代納稅人送大禮。

實情係行管會之前訂落嘅條款被指過分苛刻,兩度招標都冇人競投成功,先至被迫進一步放寬條款作第三度招標。但行管會唯一冇放寬到嘅,就係新大樓餐廳嘅食品定價,必須照顧喺大樓內工作的秘書處職員、議員助理同傳媒需要。

試過菜嘅議員更大讚平靚正,奶茶咖啡等一般熱飲只賣八蚊杯、凍飲就加多一蚊,被視為測試是否「不知民間疾苦」嘅指標食品粟米斑塊飯,就賣二十五蚊一碟,抵過好多平民茶餐廳,真係買嚟掟都抵!

設計圖片