機場保安漏洞多 恐怖分子笑呵呵

全世界任何地方,機場保安都係重中之重,有乜甩漏後果不堪設想。估唔到屢獲殊榮嘅香港國際機場,居然係自出自入嘅「無掩雞籠」。保安大唱空城計,最開心嘅睇怕係恐怖分子咯。

赤鱲角機場前日下晝上演一齣半裸男大戰特警鬧劇。一名由澳洲經香港返特拉維夫嘅以色列青年,居然出現喺機場捷運系統管道入面。呢位不速之客剝晒衫褲剝晒鞋,同追截嘅港鐵職員、機場特警同保安員「肉搏」,最終被警方用胡椒噴霧制服。捷運系統癱瘓咗四粒鐘,過萬名旅客受影響。

事後,機管局同港鐵互相推搪鬥卸責,對管道點解可以任人出入含糊其辭。機管局尋日出嚟解畫,話呢名青年係由月台車頭位置同幕門之間嘅八吋空隙進入管道,控制室發現後即時報警,警方十分鐘後將佢拘捕。至於佢喺管道入面停留咗幾耐,警方話仲查緊。

機管局強調,機場之前未發生過同類事件,又解釋話,捷運系統係根據國際標準設計同運作,會聯絡生產商研究改善方法。言下之意,即係話就算有問題,都係設計上甩漏啫,唔等於管理出問題。

叮!捷運列車係無人駕駛啫,但唔等於可以無人監管吖嘛。有乜理由等有人落到管道路軌至被發現?今次呢個後生仔身上冇帶攻擊性武器就話好彩啫,如果換咗係恐怖組織成員,身上仲藏有爆炸品,到時搞到車毀人亡,試問點算?

查實,本港航空保安早已經響起警鐘。今年年初,內地青年戴上「人皮面具」喺本港機場成功登機並企圖偷渡加拿大嘅醜聞曝光冇幾耐,杜拜民航局又發現由香港空郵中心寄出嘅五盒工業用膠水,內含懷疑危險品,通知本港民航處跟進。原來香港郵政同香港機場保安公司安檢存在漏洞,畀懷疑危險品輕易上機仲懵然不知。

點知大半年過咗,情況不但冇改善,仲發展到畀三唔識七嘅乘客獨闖捷運列車管道。咁落去,容乜易下次有人夠膽死入埋駕駛艙,坐上機師個位,甚至揸走架飛機o架,叮!

話時話,香港機場得獎無數,早前又蟬聯世界十佳機場冠軍,計計埋埋,本港機場自啟用以來已超過四十次奪得最佳機場美譽。計太一叮話齋,其實乜獎都係假,港人最想見到嘅獎只有一個,就係最安全機場獎嘞,叮!

「Money18免費即秒股票報價網站」現推出8升級功能,財經資訊,實時實發!