政壇：搞搞政：運署搭車apps歧視Android迷

最近運輸署推出咗個「香港乘車易」手機應用程式，但只係整咗個iPhone版本，冇照顧到唔係用開iPhone嘅一眾Android用戶。

個Apps其實都幾有用，讓市民可以免費搜尋「點到點」嘅公共交通路線，萬一出到街唔識搭車，幾分鐘就搞掂。原本係一件好事，但政府都可以搞到民怨四起，認真要檢討吓啦。政府尋日喺facebook宣傳呢項新猷，隨即被網民群起攻之，第一個留言已經係將矛頭直指政府，網民「chu dau」大呻「乜Android唔使用咩?」狠批政府唔理其他牌子嘅智能手機使用者。

之後網民愈鬧愈激，「Fumi Tsui」話「世上只有iPhone？唔用iPhone 就唔配做人？做事公平一啲。」將Android用戶心聲講得一清二楚。政府咁唔識撈，只係整iPhone版本，其實有迹可尋，大家都知道煲呔曾向來喜歡用Apple產品，唔知運輸署係咪都為咗迎合主子意思，先特登唔理其他用戶呢？咁即係親疏有別啫！