政壇：林公公眾高官夕陽任期鬥歐遊

財爺鬍鬚曾正喺北京參加研討會，律政司司長月初亦去咗歐洲，出訪巴黎、布魯塞爾同海牙。上位做政務司司長（CS）嘅「林公公」林瑞麟先坐正唔夠一個月，位都未坐暖，就急不及待出去玩，仲話要去到德國同波蘭咁遠添！

林公公後日夜晚就會出發去德國柏林，下個星期三就會轉往波蘭華沙，星期五先返到香港，真係玩足成個禮拜。期間會由教育局局長孫明揚署理CS職務。聽CS辦公室講，林公公今次去柏林同華沙，會拜訪當地嘅政府官員同會見商界人士，介紹吓香港同促進兩地交流，推廣粵港合作所提供嘅投資同營商機會。佢亦會參觀柏林嘅文化藝術設施，為西九嘅發展作參考咁話。

老實講，呢排夕陽政府班高官都趁餘下任期積極「外訪」。好似發展局局長林鄭月娥咁，今個月初先喺意大利返嚟，尋日又話去芬蘭喇。之不過因為林公公之前係喺政制及內地事務局，所以咁多年都冇乜機會外訪，就算去嘅話嚟嚟去去都係返內地，有時仲係做速遞員，喺近年先去過台灣咋！

未坐CS北上悶到暈

好似佢上個月未坐正CS個位時，都只係去江西出席吓啲泛珠三角區域嘅合作發展論壇，真係悶到暈。依家有機會行遠啲，佢點會放過吖？不過，林公公餘下呢九個月嘅任期，真係要好好把握機會去玩喇。皆因下屆邊個做特首都未知，有邊個會留位畀呢個民望插水嘅前CS吖﹖