罰黑店不能輕手 保招牌必須重拳

偷呃拐騙做得多，遲早會斷正。本港三間賣假藥而被定罪嘅藥房，畀消費者委員會公告天下，呢啲咪叫上得山多終遇虎囉。

三間藥房分別罰款一千五百至二萬蚊不等，其中一名店東更被判監一個月，緩刑十二個月。唔講唔知，原來其中一間藥房早有前科，有職員曾因涉嫌襲擊拒絕被屈嘅台灣遊客，要守行為。係呢，三間藥房究竟賣乜嘢假藥呢?咁就多咯，簡直係五花八門，由男人情有獨鍾嘅壯陽藥，到老少皆宜嘅「看門口」藥油都有。

叮，連假春藥都賣，唔係啩？須知壯陽藥就算係正貨，使用不當都可以致命，更何況係流嘢。本港近年經常聽見有人服用來歷不明嘅壯陽藥，連命仔都冇埋，證明嘢可以亂食，壯陽藥唔可以亂用，藥房賣假藥都只係輕輕罰款就算數，邊有阻嚇作用o架！

呢，連消委會對刑罰過輕都頗有微言，話今年三月起公布賣假藥藥房名單之後，舉報數字少咗，證明呢招「略有效」，又話如果法庭判得重啲，相信可以令有關店舖喺犯事之前，考慮吓賣假藥面對嘅嚴重後果。

冇錯嘞，治亂世用重典，保名聲同樣要出狠招。本港四大經濟支柱，旅遊業幾乎係其中最重要一枝，中外遊客尤其係內地同胞蜂擁而來，貪嘅唔係吃喝玩樂，而係「購物天堂」嘅信譽，如果連呢樣都冇埋，香港等於玩完。

好簡單，人哋千里迢迢嚟購物，就係認為喺香港買嘢貨真價實，童叟無欺，唔使驚買咗假貨。藥房公然賣假藥，而且仲涉及欺騙遊客，當局居然高高舉起，輕輕放低，所謂「處罰」似「鼓勵」多啲。如果其他藥房有樣學樣，試問點算？

最可怕嘅係，賣假藥不過係冰山一角，專呃遊客嘅不良店舖通街都係，賣相機、賣電器、賣衫褲、賣波鞋、賣海味乜都有。以黑心海味舖為例，除咗誤導遊客以高價購入次等海味，仲以「斤變両」、「両變錢」手法呃秤。消委會數字顯示，涉及參茸海味舖嘅投訴近年有上升趨勢，今年截至八月嘅數字，已經遠遠超過○九年全年。

購物天堂名不副實，金漆招牌岌岌可危。計太一叮話齋，執法者必須重拳出擊取締無良黑店，檢討現行法例以增強阻嚇力更加刻不容緩，「工欲善其事，必先利其器」吖嘛。唔該曾蔭權政府醒醒定定，唔好諗住等收工，如果購物天堂招牌不保，即使市民放過你，阿爺都唔肯過你喇，叮！