政壇：大新開分行高層晒冷贈興
銀行開分行，不外乎舞獅同搵一、兩名高層坐鎮贈興，不過，大新銀行尋日喺大埔開分行就非常大陣仗，六名高層到場支持，最高領導人階級嘅行政總裁、執行董事，以至部門主管如財富管理、分行業務、證券服務，甚至係人壽業務行政總裁都畀面撐場。
大新銀行執行董事藍章華話，計埋新開嘅元朗分行，總數達四十九間，希望明年再增三間，重點地區嘅分行亦都會設立投資服務專區、證券服務中心、VIP銀行服務中心，仲力銷VIP入場門檻只係五十萬港元，做街坊生意都可以令客人享受到VIP服務。
依家港股非常波動，歐美環境又似乎立立亂，藍生話香港經營環境都仲係幾好，希望全年都維持到咁話，對未來前景都仲係審慎樂觀，唔係就唔會新設或翻新分行，仲增加咁多人手啦。