立法會新大樓甩漏多，最近班女議員投訴，話入面嘅燈光好黃，照到人好似黃面婆咁老。新民黨主席葉劉淑儀尋日就嘈話︰「嘩，我見到啲女同事影出嚟啲相個個都黃晒，我都好擔心！」然後又話：「已經老啦，仲要影老啲，真係慘喇！」所以從上鏡角度嚟睇，都係覺得以前舊大樓啲燈光靚啲，懷緬以前啲燈光多啲咁話喎！
另外，攝影記者亦投訴新大樓外嘅示威區同採訪區位置安排，採訪區對住啲示威者影相時，成日背光，影到啲相都好黑，有攝記仲同立法會秘書長吳文華反映添。