政壇：發叔晒實力懶理夕陽政府

新界鄉議局喺嚟緊嘅禮拜六舉行村代表大會，大力數臭政府嘅惡行，但鄉議局冇邀請現屆政府代表出席，反而搵嚟唐唐同CY梁振英兩位疑似特首候選人做嘉賓。點講都好，鄉議局主席劉皇發話晒都係現屆行政會議成員，依家連鄉議局都唔畀面夕陽政府。

鄉議局咁樣做都不無道理嘅，一來今年佢哋因為僭建同保育問題，同發展局局長林鄭月娥嘅關係跌到落去冰點咁滯，二來鄉議局左右到嘅特首選委票大約有成一百票咁多，與其嘥心機同現屆政府周旋，倒不如早啲向疑似特首候選人開列條件拗數好過啦！

鄉議局本來為咗想顯示實力，動員一千二百位村代表出席大會，點知截至尋日都只得四百五十人左右，難怪執委會會議上，領導層態度強硬地向村代表吹雞。話時話，鄉議局執委會今日就職，早前有村民揚言會送幅「永遠懷念你」、潛台詞係好行夾唔送嘅牌匾畀嘉賓煲呔曾，最終送唔送得成就今日先知喇。

唐唐CY相遇互當透明

至於唐唐同CY尋日又同獲邀出席一間著名時裝旗艦店開幕禮，但兩人前後腳到場，仲各自喺會場內同朋友傾談，兩人近在咫尺，但大家都當對方透明，全程零交流。

唐唐尋日朝早繼續做親民騷，參觀九龍塘東華三院黃笏南中學，有學生問佢對九十後嘅睇法、點樣幫學生從政？唐唐就無啦啦話，家長對後生一代有較激嘅言論係出於緊張，又話自己有時可能用詞不當，畀人大做文章，會經一事長一智咁話，似懺悔補鑊多過答問題。