焗住安裝八達通 領匯玩殘小商戶

潮流興講霸權，唔單止有金融霸權、地產霸權，依家仲有街市霸權添。

金融霸權、地產霸權好理解，咁乜嘢叫做街市霸權呢？即係咁，上市大機構領匯，要求轄下屋邨街市商戶檔主安裝八達通，大埔大元街市首當其衝做咗白老鼠。嗱嗱嗱，唔理你賣魚賣肉、賣菜賣瓜、賣元寶蠟燭，總之都要裝八達通。人喺屋簷下，不得不低頭，商戶點唔鍾意都要安裝。如果抗命，領匯屬下嘅管理員就會化身成內地城管，日日巡場，搞到你冇啖好食。仲有最毒一招，約滿後可能唔續約。

點解要裝八達通呢？領匯行政總裁王國龍話喎，引入八達通係想提升租戶營業額，亦可增加領匯收益。鬼咩！提升租戶營業額係呃人嘅，增加領匯收益、蠶食小商戶血汗至真！

好簡單，喺街市引入八達通，檔主未見官先打三十大板！每個月除咗要畀一百九十八蚊月費，仲要按營業額畀交易費百分之一點五。如果做一萬蚊生意，就要畀一百五十蚊交易費，兩萬就要三百，如此類推。

小數怕長計。你知啦，好多街市商戶都係小本經營，依家搵食艱難，舖租又貴，人工又貴，水電來貨樣樣加價，小商戶死慳死抵先至可能搵嗰雞碎咁多，再安裝埋八達通，成本又增加，咁即係將人逼到死角啫。

安裝八通達唔係話唔好，但係有樣嘢大家一定要知道，即係具體問題要具體分析。街市經營嘅都係小生意，而光顧街市嘅多數係長者，不嬲都係現金交易，唔習慣使用八達通。所以咯喎，有商戶安裝八達通機後，一個月都冇人「嘟」過，索性收埋部八達通機，你話裝嚟係唔係嘥氣！叮！

其實，領匯自接手屋邨街市以來，肆意加租、趕絕小商戶嘅醜聞多到十隻手指數唔晒，家陣焗街市檔主安裝八達通，簡直係變本加厲。點講都好，安唔安裝係要自願嘅，如果一味強人所難，香港仲係自由市場咩！

咪話太一叮唔提醒，民生多艱，加上無能政府，市民早就滿腔怨氣。領匯繼續惡爺上身，一味大蝦細，直頭火上加油，因住「佔領中環」遲早演變為「佔領領匯」呀！叮！