煲呔曾喺○九年嘅施政報告提出推廣使用慳電膽計劃，期間爆出涉嫌向姻親輸送利益，結果無疾而終。兩年後，環境局局長邱騰華提起呢個計劃，仍然係多番迴避。
話說邱騰華尋日接受電台節目訪問，再被主持人問及會唔會重推慳電膽計劃時，佢起初冇正面回應，只係話大部分地方已唔單止使用慳電膽，部分更已改用LED燈；其後佢又話兩年前提出慳電膽券計劃，因種種理由而擱置，而目前慳電膽已成市場上嘅主流。講嚟講去，佢都係想講依家唔會硬推慳電膽計劃啫！