政壇：D姐請屈奇安食閉門羹

尋日召開嘅立法會公務員委員會會議原本要討論設立侍產假嘅細節，但消防處救護員工會前主席屈奇安被拒出席消防處部門會議事件就變成會議嘅重點，多名議員不停質詢公務員事務局局長「D姐」俞宗怡。D姐解釋話，參加會議嘅代表人士要係紀律部隊嘅在職人員，又話內部會議可能涉及機密資料討論，所以有非現職人員在場唔係咁方便喎。

不過，由香港公務員總工會聯合會主席轉任總幹事嘅梁籌庭同香港政府華員會會長黃河都有參與所屬嘅相關部門會議，梁籌庭仲話多年嚟從未聽過D姐口中嘅規矩，仲叫當局攞啲條文出嚟睇吓喎！

消防處救護員工會十五個代表就趁尋日立法會開會，走咗去新立法會大樓外示威同遞交請願信，指屈奇安自從五月退休後，消防處就阻止佢出席部門會議；救護員代表都話消防處咁做好明顯係好唔合理。屈奇安將代表新民黨出選黃大仙區議會新蒲崗選區，其他候選人仲包括李達仁同社民連梁日明。