政壇：CY支持度遠拋唐唐

兩名疑似特首候選人呢排短兵相接，而港大民意研究計劃今個月進行嘅最新民調顯示，支持CY梁振英做下屆特首嘅比率大幅拋離唐唐。CY近排頻頻落區，前日先踎完天橋底，支持率如搭直升機，由七月份嘅百分之八爆升至百分之二十九，升上榜首；但同樣係落區，唐唐嘅支持率就以龜速前進，由百分之十升至百分之十四，支持率只有CY嘅一半。

調查仲話，有兩成半受訪者因為唐唐嘅「感情缺失」而對佢有負面睇法。至於支持度由三成二暴跌至一成九嘅全國人大常委范徐麗泰，就回應話：「民望有升有跌，民望不可恃。」

CY同唐唐前日仲一齊落深水埗聽基層訴苦，撞到正一正。據聞呢種「撞區」情況會陸續有來，好似鄉議局呢個禮拜六就會舉行村長代表大會，屆時會請埋佢哋出席，聽吓班鄉紳有乜意見。不過，原來雙方都唔知道對方會同場出現，聽到呢個消息後都大吃一驚。兩人同台演出，到時實有好戲睇。