政壇：搞搞政：叫青年進修上流 富貴Eva脫離民情

運輸及房屋局局長Eva鄭汝樺早幾日公開話，後生仔咁快標籤自己係公屋受益人未必有好處，應該自我增值進修一下，咁咪有上流機會囉，仲叫社會討論吓呢個問題，於是網民響應Eva號召，喺網上激烈討論，但十居其九都係鬧爆佢。

有網民就喺討論區反問：「唔住公屋我邊有錢進修？」有網民更埋怨：「放工返屋企都九點十點啦，何來有時間進修呢？」另一網民坦言：「就係太多人進修咗都無向上機會，先至迫不得已申請居屋，依家掉轉頭叫人進修？」

相信網民都唔係憎人富貴，只係Eva脫離民情啫！梗係啦，佢有幾層樓揸手，喺油尖旺區擁有兩個自用物業，早前又放售京士柏山嘅物業，叫價六千萬元，只係一直未能賣出，但佢喺九招十二式政策出台前突然封盤，備受質疑。難怪有網民批評「你自己炒樓賺大把錢」，搞到貧富懸殊得咁犀利。

換言之，Eva上咗岸咯咪講風涼話囉，又唔怪得班網民咁嬲嘅。