政壇：譚志源兜圈林公公二世

俗語話「屁股控制腦袋」，即係話人坐緊乜嘢位置，個腦就會諗乜嘢，原來真係啱嘅。最近升官坐正政制及內地事務局局長嘅Raymond譚志源，曾經畀議員讚過講嘢唔會遊花園，但尋日佢首次以局長身份同議員開會，估唔到即刻好似畀前任局長亦即係佢恩公林公公上身咁。

事實上，喺尋日政制事務委員會中，得工聯會王國興有祝Raymond好運，其餘議員發言前都不忘潤一潤佢。好似工業界林大輝咁，一開波就話Raymond做到呢個位都未必係好事，事關呢個位出晒名係「三煞位」；劉慧卿更加話「以前嗰個衰到貼地」，希望Raymond同議員關係唔好搞到咁差。

升做局長有原因

之後大輝同公文袋議員都有質問Raymond，究竟幾時先檢討政治委任制度，同埋會唔會取消，但佢似乎學足恩公「不停播帶」嘅做法，重複幾次話適當時候政府會有建議。於是大輝開始發火，話上任局長只係識遊花園，唔想見到呢一任都係咁，Raymond都係話遲啲一有具體意見，會即刻同立法會議員討論。

之後白鴿黨張文光問佢幾時先一次過取消區議會委任制，但Raymond依然話社會未有共識，要平衡各方面意見，但問佢究竟乜嘢人反對取消委任制，佢又答唔出，繼續重複答案。睇嚟煲呔曾揀中佢做局長，似乎都係因為佢似足林公公嘅風格，相信連班議員都諗唔到，局長換面唔換人，都係林公公嚟。