新聞自由遭箝制 獨裁必然犯眾憎

警方最近愛扮「啞男」，太一叮淨係知有「啞女情深」，唔知有「啞男情深」。點解咁講，事實擺喺眼前，近日觀塘翠屏邨撞胸色魔又重現，連續兩日共有四名女學生被人批㬹撞胸，警方又係秘而不宣，四日之後先至事件曝光。事件令區內女居民人心惶惶，擔心會成為非禮目標。

大家應該記得今個月頭，將軍澳驚現口罩刀客，以利刀從後刺傷四名路人。警方遲咗成個星期先公布，事關人命居然唔第一時間廣布周知，公眾輿論炳到七彩。

唉，好心啲差人唔好成日扮啞又撞聾啦！事後警方誓神劈願話會改進，仲話會好好檢討如何平衡各方面嘅利益喎。言猶在耳，撞胸色魔事件又玩隱瞞，咁算唔算改進咗吖？算唔算平衡各方嘅利益吖？

睇吓記者訪問區內女學生同女居民就知啦，佢哋個個嚇到花容失色，鬧爆警方唔第一時間公布，等佢哋知所提防。如果因為警方延遲公布，而造成更多受害者，太一叮不禁要嘆一句：警方封鎖消息，令色魔有恃無恐！叮！

講開又講吖，兩年前《太陽報》同埋《東方日報》揭發觀塘「撞胸阿叔」，專向女途人批㬹撞胸，記者全程直擊過程，警方其後根據有關報道，終將色魔繩之於法。不過，聽講個色魔踎咗半年已放監啦，咁，今次單嘢係唔係佢做㗎？

嗱嗱嗱！呢啲咁重要嘅訊息，係市民都想立刻知道，上次咁啱畀記者揭發，自然第一時間話畀公眾知，今趟落喺警方手上，就冇呢隻歌仔唱嘞。如果警方對風化案繼續沉默，女學生同女居民就有得震冇得瞓。

最近政府擺出個陣，完全係想剝奪市民嘅知情權，除咗無所不用其極打壓記者正常採訪，連立法會都透過特首辦施壓。立法會保安人員粗暴阻撓記者採訪，箝制新聞自由嘅幕後黑手居然係曾蔭權。

警方○四年將通訊系統數碼化，美其名「改善」，實際全面「熄機」，記者攞唔到料，連消防同救護車都截斷埋！

太一叮想問一問曾蔭權政府，箝制新聞自由係咪要玩獨裁專制？係就出聲囉，太一叮相信全港示威者會同犯眾憎嘅閣下玩鋪勁！