政壇：搞搞政：煲呔曾行街被寸黑社會

話說尋日朝早，出選中西區議會上環選區嘅選民力量嚴達明，同人稱「肥橙」嘅東華區候選人李肇昌落區派傳單，點知行到皇后大道西樓梯街附近嘅茶舖時，見到着住街坊裝嘅煲呔曾兩公婆行街，隔籬仲有個保鏢，真係冤家路窄。

達明話因為周圍有佢嘅宣傳直幡，所以煲呔曾應該知道佢係邊個，同埋會認得佢，所以想扮睇唔到佢，行咗入茶舖。肥橙原本想行近煲呔曾，但就畀保鏢伸手示意唔好行過去，一副生人勿近咁款。

煲呔曾早幾日暗指人民力量立法會議員黃毓民嘅表現猶如「黑社會」，達明就大聲同佢講︰「人民力量冇人係黑社會。」做牙醫嘅佢仲話︰「曾生，我係醫生，唔係爛仔。」煲呔曾聽到後咿咿哦哦鬼食泥咁，最後笑笑口尷尷尬尬咁行咗去。佢喺發表《施政報告》時將「尾大不掉」嘅「掉」字讀錯咗，達明就話︰「記住係尾大不掉，唔好再記錯！」呢個時候曾太好似想還擊，但就畀煲呔曾拉住。同嚴達明同區參選區議會嘅有甘乃威、陳賢豪，而同李肇昌同區嘅就有蕭嘉怡同何俊麒。