政壇：超蓮宣揚尊重動物生命
超蓮秉承咗爸爸賭王何鴻燊行善積德嘅傳統，一向喜愛小動物嘅佢首次答應為香港愛護動物協會舉辦嘅慈善影展擔任大使，佢話媽咪陳婉珍自小教導佢學懂尊重生命嘅重要。佢話：「當初屋企養隻小松鼠狗小吉時，媽咪同我講要對小狗負責任，唔係只陪狗仔玩，到清理狗仔大小二便時就依賴工人。」
早前佢為活動拍攝宣傳照時，原本打算帶埋小吉出鏡，但拍攝當日小吉病倒，故協會特別搵咗一隻同小吉差唔多嘅狗仔代替，而呢隻狗仔係時裝設計師何國鉦胞弟嘅愛犬。原來協會○七年曾經同何國鉦合辦慈善影展，今年再度合作，為宣揚尊重動物生命同飼養寵物嘅責任，邀得多位名人同佢哋嘅寵物參與拍攝影展。
超蓮早前為愛協拍攝活動宣傳照。