政壇：佳叔播帶遭圍插

全城鬧爆煲呔曾任內最後一份施政報告，而報告中話社會對全民退休保障冇共識，若果依家去做係不切實際，更令社福界怨聲載道，而作為政府「大腦」嘅中央政策組首席顧問劉兆佳，尋日出席《城市論壇》時就被圍剿。

立法會福利事務委員會主席張國柱批評依家嘅退休福利制度有好大問題，生果金唔夠使，強積金又畀啲積金公司食晒，現存嘅所謂儲蓄、強積金同綜援網三根安老支柱制度根本完全崩潰，政府卻否定咗全民退休保障，「未來長者有成二百一十萬人，點解政府研究十年都冇任何報告？」

被轟齋做研究

理大應用社會科學系講師張超雄亦炮轟佳叔，話：「調查話有八成人支持全民退休保障，社會已經有共識，但你（劉兆佳）一味話做研究，一份報告都冇，根本係鴕鳥政策！」佢又話本港貧富懸殊已去到唔可以接受嘅地步，政府仍係用蝸牛步伐處理問題。

台下發言亦火藥味甚濃，有市民話強積金年年蝕錢，「我哋點可以依賴強積金？」有爭取全民退休保障聯席成員亦質疑：「研究優化強積金係咪社會共識？係咪應該將全民退休保障攞出嚟做公眾諮詢？」

面對各方圍剿，佳叔就一味縮，仲人肉錄音機上身咁款，只係不斷重彈老調，話研究未完成，仲需要改進，又話社會未有共識，「社會缺乏團結性，好多人都唔係好想將自己嘅錢同其他人嘅錢一齊用。」佢認為修改現有三根安老保障較可行，又建議民間應凝聚共識，爭取各方支持，咁即係又拋番個波畀市民，或者等下屆政府接呢個燙手山芋啦！