佔領中環星星火 民怨升呢勢燎原

正所謂，哪裏有壓迫，哪裏就有反抗。大家咪誤會，太一叮唔係講緊「茉莉花革命」，而係指「佔領華爾街」，前者係流血事件，死得人多，後者係和平示威，唔涉暴力。

呢，由美國人率先發起嘅「佔領華爾街」之火愈燒愈猛，唔止蔓延全美國，而且蔓延全世界，估計全球最少有一千個城市響應，香港亦唔例外，今次都咪話唔大鑊。尋日咯喎，多個團體共數百人喺中環交易廣場附近空地集會，高掛「反資本主義」、「打倒金融霸權」等標語，聲援美國「佔領華爾街」行動，部分示威人士仲帶備帳篷，準備長期抗爭添。

美國人「佔領華爾街」，主要係抗議金融貪婪，反對政府偏幫富豪，導致貧富懸殊日益惡化。其實，呢啲資本主義嘅醜陋現象香港統統都有，而且比美國猶有過之添。例如雷曼事件就係金融貪婪引起嘅囉，銀行唯利是圖，隨便向普羅大眾推銷風險極高嘅所謂迷債，搞到好多老人家血本無歸，棺材本都蝕埋，欲哭無淚。銀行連老人家都呃，固之然無良，而港府監管不力，放任垃圾債券禍港，更加難辭其咎喇。嗱，今次佔領中環行動，就有唔少雷曼苦主參加，佢哋真係「造反有理」o架！

至於講到貧富懸殊，美國更加冇得同香港比嘞。煲呔曾喺施政報告自吹自擂，聲稱香港GDP咁多年嚟升咗幾多，又話就業職位增加咗幾多，其實全部係吹水唔抹嘴。真相係，本港貧窮人口已增至一百二十六萬，其中在職貧窮人口就有近七十萬，淨係睇吓今時今日仍有數以十萬計基層市民住喺籠屋及劏房就知貧窮問題有幾嚴重，但施政報告居然隻字不提，你話唔嬲就假，叮！

話時話，香港人一向係理性嘅，從來冇乜仇富仇商情緒，近來之所以愈來愈多暴力抗爭場面，雖然有政客喺後面煽風點火，渾水摸魚，但歸根究柢都係因為港府管治無能，施政混亂，搞到深層次矛盾惡化，民怨沸騰。

嗱，舊年中大有項民調顯示逾四成人贊同激烈抗爭，呢個已經係危險警號，如果港府仲唔諗辦法改善施政，消除民怨，任由呢種情緒繼續蔓延咯喎，香港遲早冇運行。咪話太一叮唔提醒，星星之火，可以燎原o架，今日示威人士就話佔領中環啫，再發展落去，話唔埋變成「佔領禮賓府」都有之呀，叮！