CULTURE嗡：人人為 Smart「瘋」

Smartphone（智能手機）風行全球，其上網及玩遊戲等功能，更是80、90後摯愛。年輕人無時無刻機不離手，你撳我又撳！香港中華基督教青年會荃灣會所助理主任幹事溫振鵬指出，Smartphone為用家帶來方便，亦改變他們的生活規律，因此用家必須懂得節制使用，避免沉迷而影響日常生活。

這次找來本港首批Smartphone青年用家之一的Kinki，分享使用智能手機後對生活的改變。

Kinki：大概三年前，當時Smartphone仲未算流行，我就開始使用，但只係用嚟打電話及send SMS。直到一年前，我轉用另一款Smartphone，用嚟上網睇片、玩遊戲、影相，仲用WhatsApp同朋友傾偈，真係好方便！

溫：Smartphone為用家帶來方便，尤其可以隨時隨地上網同玩遊戲，故此深受年輕人歡迎，唔單止80後，甚至中學生，小學生都使用。

Kinki：我已經慣咗經常check住部機，每隔幾分鐘，就會撳吓部電話，睇吓有無朋友搵我，或者會唔會有朋友喺facebook有新update。部Smartphone稍為離身，就會覺得好唔自在。即使只係落街幾分鐘，都一定要帶喺身邊，我阿哥仲誇張，沖涼都拎埋佢去浴室！

溫：Smartphone正影響我哋正常生活，好似喺街頭，經常看見部分人即使與朋友聚會，都會不斷喺度撳電話，反而同身邊嘅朋友無乜兩句。亦有部分原本無打算用Smartphone嘅人，因為身邊朋友都用，擔心少咗個共同平台，甚至有被遺棄感覺，被迫改用Smartphone。

Kinki：對於我嚟講，Smartphone已經係一部集溝通、娛樂等多功能於一身嘅工具。如果要我用番只有打出打入功能嘅電話，我肯定好唔習慣！

溫：其實，使用Smartphone嘅目的係方便自己，唔係掉轉頭畀Smartphone嘅用途牽住鼻子走，所以用家一定要好好節制，唔好長時間玩遊戲，或者用啲非必要嘅應用程式，避免沉迷，影響日常工作及作息規律。

Kinki

90後大專生，首批青年Smartphone用家，三年前使用至今。

溫振鵬

香港中華基督教青年會荃灣會所助理主任幹事、註冊社工，經常接觸不同背景的青少年，了解新科技如何改變年輕人生活。