政壇：嫻姐懶理維園阿哥狙擊
十一月嘅區議會選舉，人民力量「維園阿哥」任亮憲空降黃大仙挑戰工聯會「票后」陳婉嫻（嫻姐），喺維園《城市論壇》闖出名堂嘅維園阿哥邀嫻姐落區舉行選舉論壇，但嫻姐拒絕應戰，尋日維園阿哥拉埋人民力量立法會議員黃毓民落區，收集居民簽名，希望再逼對方就範，但嫻姐一於當佢透明，任亮憲呢次真係冇晒符。
任亮憲尋日印咗萬二張傳單狙擊對手，指工聯會同中央關係密切，又質疑嫻姐唔會全心全意服務街坊喎。早前落區鬧咗單被打糾紛嘅佢又話，今次隨時又會畀人打多一鑊，不過尋日所見好太平啫，佢似乎多心喇。除咗任亮憲同陳婉嫻外，同區參選嘅還有民主黨嘅林偉基。