政壇：土木署陳志明勸捐被插

捐款本嚟係講心嘅慈善義舉，土木工程拓展署最近就傳咗單負面消息，事關該署助理署長（行政）陳志明早前發咗個電郵畀班同事，呼籲建造業界一分子嘅同事捐款畀「建造業關懷基金」，幫助啲因為工地意外而不幸過身嘅工人家庭，仲鼓勵大家慷慨解囊，將政府派畀市民嘅六千元捐出嚟，電郵發出後，卻惹嚟佢強迫同事捐錢嘅質疑。

陳志明上月底向同事發咗封電郵，話工地意外嘅新聞時有聽聞，今年土木工程署自己轄下嘅地盤都發生過嚴重事故，導致有工人死亡。陳志明就呼籲同事為有需要嘅家庭提供經濟援助，向「建造業關懷基金」捐款，今年嘅籌款目標係一千萬元咁話，而基金至今已經籌到六百萬元㗎喇。

其實，佢嘅電郵已經講明呢次籌款係自願性質，「強迫」之說似乎唔成立，不過事件既然惹嚟署內同事唧噚，都可見有人感覺負面，睇嚟官員勸捐都要謹慎啲！