政壇：搞搞政：IQ博士力行老人政治

明年嘅立法會選舉牽一髮動全身，部分功能界別議席一早已經爭到頭崩額裂，好似中總嘅議席咁，近期就再傳新版本。事緣今年七十幾歲嘅立法會代表「IQ博士」黃宜弘盤據議席十多年，早有內部聲音想換咗佢，先傳由「新金王」黃英豪接班，但自早前爆出廉署請飲咖啡事件後，中總已經靜靜咁搵咗方文雄做「替補」，點知最近又有新發展。

據聞，黃宜弘人前人後都同人講自己好有活力，早前又埋堆加入由多個親商政團組成嘅工商專業聯盟。甚至中總內部最近仲傳咗個說法，話明年政府換屆，應該要搵啲有經驗嘅議員壓場，一切說法只為咗堆陳一個事實：老議員先得o架！

好笑嘅係，多名夠晒年齡攞生果金嘅功能界別議員，好似鄉議局主席劉皇發、工程界何鍾泰都想再坐一會；而啱啱夠六十五歲嘅霍震霆，多年來未有對手亦想繼續玩落去，咁搞法，立法會真係可以組成一隊耆英隊喎！