政壇：張一鳴憂新居屋拖冧政府
千呼萬喚之下，政府終於宣布咗新居屋計劃，名額少、補助方式等已經引起唔少疑慮，尋日連地產分析員都對個計劃抱觀望態度，擔心本嚟協助市民置業嘅賣大包計劃，掀起一窩蜂申請熱，無論係想置業、等置業、置業當炒樓嘅人都去申請，到時真係想幫嘅人幫唔到，反而造成長遠負擔。
有星級地產分析員稱號嘅張一鳴，尋日以基金界人士身份出席一個投資講座，佢話新居屋計劃相當優惠，但佢就憂慮市民會一窩蜂咁去申請，到時社會上嘅住屋需求將被人為地推高，日後恐怕港府要不斷興建新居屋以滿足需求，長遠會為港府帶來非常沉重嘅財政負擔。
講到樓市發展，佢話環球資金鏈持續收緊，本港按揭利率亦會上升，加上部分內地人將資金撤出香港樓市，預期樓市交投將會維持淡靜。
張一鳴認為新居屋可能造成一窩蜂申請效應。