政壇：煲呔曾Q&A 青協河蟹護航

煲呔曾發表任內最後一份施政報告後，去立法會首仗就同激進派議員擦出火花，佢大發爛渣固然引嚟唔少批評，仲再次暴露佢嘅臭脾氣。煲呔曾唔襟激，偏偏佢又要扮開明，聽日夜晚七點，佢仲會上網現身「時事Q&A」回應市民對施政報告嘅提問，不過有80後、90後網民卻對呢個Q&A意見多多，質疑問啲尖銳問題會畀煲呔曾反寸！其實，佢哋唔使咁驚喎，因為今年嘅Q&A未必一定會火花四濺，事關煲呔曾班底似乎已靜靜雞將活動河蟹咗。

近年施政報告發表後，煲呔曾都會喺網上舉行一場問與答，特首辦以往都搞過幾次「時事Q&A」，但都係官方主辦，但今次就搵來出咗名「河蟹」發問者提問嘅青協幫手，網民喺特首辦社交網站facebook回應件事，十居其九都係鬧衰煲呔曾。

厚面皮暗讚自己

尤其係日前煲呔曾喺立法會發爛渣爆「黑社會」同「爛仔」論，網民就寸佢話：「問你嘢，你又唔高興，一陣屈我係爛仔、黑社會，叫禿鷹（警務處處長曾偉雄）拉我咪×街？」有網民更心灰意冷話：「問你又唔會答，你出嚟做乜？」其實，今次答問會由青協幫手，只要隨便過濾吓問題，或者篩選吓提問者，火花就大減喇，煲呔曾要控制自我都容易得多！

施政報告公布之後，好多人都為「蔭權七年」作總結，煲呔曾尋日都喺一個電台節目上為自己塗脂抹粉，佢話七年來面對過好多危機，如流感、全球金融海嘯，甚至數埋馬尼拉人質事件，結果戰戰競競、峰迴路轉，轉個彎嚟暗讚自己做好咗佢份工，真係面皮夠晒厚。