熱帶語林：蠱惑仔憤怒了

「大佬大佬，事態不妙！」

「乜春呀？有事快講，有屁快放，唔好阻住我同妹妹仔食大閘蟹。」

「一日最衰都係曾蔭權啦，佢發老脾鬧黃毓民係爛仔黑社會，幾冇品呀！」

「妖！兩個傻仔嗌交之嘛，議員都鬧得人多啦，剃人頭者人亦剃其頭，今次掉轉頭畀人鬧，有乜問題先？死開啦，真係唔好阻住我同妹妹仔食大閘蟹。」

「大佬大佬，你有所不知，如果淨係嗌交當然冇問題，不過呢一個當奴爵士踩到上心口，直情係侮辱我哋正牌爛仔黑社會。你知啦，我哋身為蠱惑仔，台型好緊要，正所謂輸人不輸陣，曾蔭權將黃毓民同爛仔黑社會混為一談，我覺得好冇面囉！」

「聽落又有道理。小妹妹，你行開一陣，我同哥哥仔有偈傾……照你所講，曾蔭權將黃毓民同爛仔黑社會混為一談，係咪將蠱惑仔身份降格？」

「梗係啦，人哋手無寸鐵一介書生，極其量掟蕉之嘛，何況掟唔中，點可以同我哋動不動就擸刀劈友相提並論！如果人人都以為講幾句粗口就係爛仔黑社會，咁我哋一定冇運行，收陀地嘅時候邊條茂里會驚我哋？」

「嗯，愈聽愈有道理。呢一個曾蔭權到底係咪懵到上心口，連議員同爛仔都唔識分？佢咁嘅講法真係令到我哋行蠱惑嘅好尷尬，你冇理由叫我哋靠把口搵食啫，噴口水冇乜殺傷力，君子動口不動手點可能同人爭地盤呀！」

「大佬呀大佬，既然呢一個曾蔭權公然侮辱，我哋係咪應該要做番少少嘢？」

「講得啱，要做嘢，士可殺，不可辱，以示蠱惑仔憤怒了！一於咁啦，你去吹雞包圍禮賓府，記住抗爭行動唔好咁斯文，還爛仔黑社會一個公道！」