無法無天無王管 港台愈玩愈離譜

一向烏煙瘴氣嘅香港電台又上演爛騷喇！早排用黑衫、黑地氈、黑標語同黑口黑面「歡迎」首日返工嘅廣播處長鄧忍光，原來佢哋意猶未盡，鬧劇陸續有來。

話說港台工會向全台員工派發「選票」，要求大家對「是否支持由政務官任廣播處長」表態，目的係抗議煲呔曾空降毫無廣播事務經驗嘅政務官做廣播處長喎。最搞笑嘅係，除咗選票上有極為敏感嘅「公投」字眼，海報仲寫上「退無可退，這是底線了，港台員工要公投！」工會負責人甚至發表公開信叫囂，「做人要有底線，再退，我的底線哪裏去了？」

簡直無法無天！上次扮晒「為民請命」嘅政客訟棍搞「公投」，今次輪到食納稅人俸祿嘅港台員工玩嘢，咁仲成世界嘅。身為公務員居然公然作反，逼當局將啱啱上任嘅廣播處長踢走，任意妄為到咁嘅地步，唔通佢哋真係以為自己惡晒，叮！

工會負責人話喎，港台員工一直對港府做法默默承受，步步退讓，今次當局做完招聘大龍鳳之後，就空降一個完全冇傳媒經驗嘅政務官做處長，根本冇尊重員工嘅廣播專業，「公投」係因為退無可退。

喂，鄧忍光已經上任一個月有多，你班公僕冇畀心機做好呢份工，依家仲發起無厘頭嘅「公投」，唔止倒納稅人米，直情挑戰「一國兩制」添吖。大家都知道，香港唔係獨立國家，根本無權搞公投，港台工會無事生非，搞風搞雨，退無可退嘅係納稅人，忍無可忍嘅係全港市民就真，叮！

講到「專業」咯喎，港台一向烏煙瘴氣，臭史多到改編成長篇廣播劇都得。呢個部門大花筒、穿櫃桶底樣樣齊，多次被審計署揭發行政混亂同浪費公帑，更有多名員工捲入貪污醜聞成為監躉添。涉及高層嘅醜聞同樣鑊鑊新鮮鑊鑊甘，助理處長張文新酒後揸車剷上山邊不過係小兒科，最經典就係前處長朱培慶畀傳媒撞正與艷女喺銅鑼灣把臂同遊，左避右閃，醜態百出，卒之要提早退休。

講到尾，港台員工對空降政務官咁大反應，無非擔心影響所謂編輯自主，冇得繼續閂埋門為所欲為啫。計太一叮話齋，姑息養奸，必留後患，既然有人咁鍾意公投，不如由市民決定係咪摺埋呢個獨立王國吖，叮！