政壇：張永霖等三日筍價買名畫
亞視前主席Linus張永霖鍾情收藏藝術品，尋日佢帶埋十幅心愛嘅中國畫，返回大埔亞視呢個是非地，暢談收藏畫作心得。問佢至今花費幾多、收藏幾多名畫，佢就故作神秘笑稱：「咁即係問我三圍啫！」
佢由十七年前開始買畫，珍藏包括林風眠、張大千、齊白石及丁衍庸等名家之作。佢曾經係年賺千萬元嘅打工皇帝，但佢謙稱自己閒錢有限，所以買畫都要睇住荷包。
幾年前，佢為咗以心水價錢買得心頭好，喺北京一個拍賣會上坐足三日，最終買到被喻為「現代八大」嘅畫家丁衍庸四屏畫作，總價十萬港元，開心到不得了，尋日仲特登帶出嚟同大家分享。佢仲教路，冇錢但有興趣欣賞中國畫嘅年輕人，不妨買入名畫嘅印刷本或海報，唔一定要昂貴嘅真迹。
張永霖展示苦等三日至買到嘅丁衍庸四屏畫作。