政壇：新立會開辯袋巾傑腹背受敵

添馬艦立法會新大樓下禮拜三首次舉行例會，兩項頭炮辯論名額分別由公文袋黨魁「袋巾傑」梁家傑同建仔議員「象哥」黃定光抽到，其中象哥將動議討論外傭居權問題，擺明係針對住被指係外傭居權案幕後黑手嘅公文袋而嚟；而袋巾傑提出嘅對疑似特首候選人期望動議，亦畀建仔主席「譚Sir」譚耀宗修訂到體無完膚，連環玩殘公文袋同袋巾傑。

高等法院早前就外傭居權案裁定政府敗訴，政府隨即提出上訴，但輸得畀政府更傷嘅公文袋就上訴無門，畀建制派撳住嚟打，炮轟該黨黨員協助外傭打官司，可能令數以萬計嘅外傭取得居港權，對本港嘅就業、福利、教育、醫療同房屋各方面都造成沉重打擊，嚴重影響該黨候選人喺下月區議會選舉嘅選情。

雖然象哥個動議嘅字眼好溫和，只係表明反對外傭享有居港權，但估計到實際辯論，又會變成批鬥公文袋大會。

譚Sir提修訂玩騎劫

福無雙至，禍不單行，袋巾傑一方面畀象哥撳住砌，另一方面自己想提番個動議搶吓曝光，仲專登揀咗好多市民關心嘅特首選舉，叫各名疑似特首候選人回應市民訴求，點知最後又畀人騎劫埋。

譚Sir已經預告將喺下禮拜三提出修訂，刪去袋巾傑原動議嘅大部分內容，再將建仔嘅競選政綱同對下屆特首嘅期望鋪晒上去，一共有成十五項咁多，由設立低收入家庭生活補助計劃，到設立自然保育基金都有。如果公文袋同其他泛民主派反對佢嘅修訂，估計建制派亦唔會支持袋巾傑嘅原議案，最後「四大皆空」，講咗等於冇講，袋巾傑今次真係賠了夫人又折兵！