居屋變成六合彩 繼往開來大隻講

煲呔曾搞搞新意思，臨別秋波推出新居屋計劃，為咗顯示同舊居屋唔同，實行賣大包，半賣半送，或者佢認為咁先至係「繼往開來」啩。可惜吖，佢嘅大包仲未做好，已經惹來劣評如潮，究竟賣唔賣得成，要睇過至知。

所謂新居屋計劃，即係將售價與市場脫鈎，改為根據買家嘅經濟能力釐定，而且日後轉售時唔使根據市況補地價添，亦即係話，新居屋業主可以獲得買樓及賣樓嘅雙重資助。唔怪得市民狂插新居屋唔公平，直情係「公眾六合彩」喇。講真，抽中居屋有賺冇蝕，真係好過中六合彩o架。

本來呢，煲呔曾為咗博取掌聲，不惜以今日嘅我打倒昨日嘅我，決定復建居屋，仲算係順應民意，無可厚非嘅。最弊佢唔按本子辦事，硬係要標奇立異，喺居屋之前加咗個「新」字，咁就出事喇。正如古人話齋，不患寡而患不均吖嘛，新居屋業主可以獲得雙重資助，咁舊居屋業主又點呢？劏房居民又點呢？做緊「房奴」嘅私樓業主又點呢？納稅人又會點諗呢？嗱，連煲呔曾自己亦承認構思有關細節時，要顧及對現有居屋業主嘅公平性。難為運輸及房屋局局長鄭汝樺仲否認新居屋係雙重資助，叮，事實擺喺眼前，無謂再死撐喇！

講開又講，就算唔提雙重資助所引起嘅非議，新居屋計劃最快四、五年後先至可以落成，遠水都難救近火喇；而且平均每年只有五千個單位咁大把，對於數以十萬計合資格家庭嚟講，簡直係杯水車薪，仲難過中六合彩。所以呢，如果煲呔曾以為賣大包就可以博取掌聲，挽回多少民望，咁就打錯算盤啦。

唉，食嘢唔做嘢，做嘢打爛嘢，咪就係指煲呔曾呢種人咯。佢上台六年幾，一直翹埋雙手乜都唔做，任由樓價飆升，對無殼蝸牛苦況視若無睹，仲要講埋啲風涼話，叫人搬去偏遠地區住喎！好喇，依家就快夠鐘走人，佢先至扮晒順應民意推出新居屋，而且美其名繼往開來喎。叮！所謂繼往開來，根本係吹水唔抹嘴，佢治港咁耐，亂足咁耐，留低一個爛攤子，連復建居屋亦引起咁大爭議，下屆政府多得佢唔少就真！

話時話，新居屋究竟可唔可以順利推出，完全係下屆政府嘅事，與煲呔曾無關，佢留低蘇州屎添煩添亂，萬一到時畀人推翻，咁就真係瘀到痹咯，叮！