政壇：國泰健美小姐難抗零食
十月份「國泰天地」訪問咗一位國泰顧客服務員Heidi余迪希，原來佢係健美小姐，舊年勇奪香港健美錦標賽季軍，獲獎後佢密密出戰，已代表香港前往新加坡、台灣同越南等亞洲城市參賽，月初又去咗曼谷參加亞洲健美錦標賽，獲得第五名。
佢話，平時佢每周前往健身中心兩、三次，備戰時更增至五次，最鍾意用跑步機進行有氧訓練，或到吐露港附近跑步，真係忙過返工；就算喺屋企睇電視，都會一邊鍛煉單臂彎曲、三頭肌屈接及弓步等，所以話完美體態得來不易。
辛苦鍛煉難唔到佢，但反而戒食零食就最辛苦，大呻係最難抗拒嘅誘惑。
