政壇：俄鋁特輯唱好港俄英雄

俄鋁係第一隻嚟香港上市嘅俄國公司，依家仲扮演埋提升兩地文化交流嘅角色。舊年佢哋搞過一個叫《蛻變．俄羅斯》嘅類似旅遊推介電視特輯，大獲好評，行政總裁歐柏嘉今年再下一城，推出《香港．莫斯科：平凡英雄》特輯，介紹兩地共十位慈善家、拯救者、兒科醫生、教師同科學家嘅心路歷程。

尋日推出嘅優先場，分別描述Tatyana Fedyaeva同羅炎玲兩位教師嘅特輯，前者啟發俄國學生鑽研數學，為俄羅斯嘅科學發展作貢獻；後者則鼓勵學生學好英文，以便與世界各國溝通，建立屬於自己嘅價值觀。

可能俄鋁亦深明「學生是未來」這句話嘅真意，除咗拍攝特輯外，仲會同香港科技大學合作一個「三部曲」，首部曲就係喺今日舉行「科大俄鋁校長論壇」，由第一個提出金磚四國概念嘅高盛主席Jim O'neill主講，分享對環球經濟動態。至於其餘兩部曲，分別係「中俄交換生計劃」及「鋁材科研計劃」。