政壇：搞搞政：譚志源超短綱領冇料到
政務司司長「林公公」林瑞麟做政制及內地事務局局長時已被揶揄為「人肉錄音機」。接手嘅局長Raymond譚志源曾經講過，佢嘅個人風格可能同佢「恩公」林公公有所不同，佢尋日立即展示新人事新作風，以極簡潔嘅用詞同篇幅向立法會講述該局本年度嘅施政綱領。
各政策局尋日紛紛向立法會提交本年度嘅施政綱領，大多數政策局大多有十至二十頁，但Raymond領導嘅政制局所提交嘅施政綱領就只有五頁，不但係各政策局中最簡短，亦比林公公過去三年嘅七頁、十二頁同十頁為少。換言之，Raymond所提交嘅綱領可謂冇料到喇！
Raymond提交嘅施政綱領夠環保，反觀做環境局局長嘅邱騰華就最唔環保，成份綱領一共有三十六頁，但內容九成九係舊聞，全無新意。咁即係話，無論長短，都係冇料到。
（設計圖片及對白）