民望趴街做司長 問責官僚嘥米飯

三千人上街話要踢走林瑞麟，遊行人士唔滿意一個民望低到趴街嘅林D9，竟然可以做到政務司司長。有人話喎，呢個世界已經冇晒公理，都唔知點教小朋友。

咁又係，一般人都知管治社會、服務社會一定要選才德兼備嘅人，家陣政府就啱啱相反，搵個幾乎全民喊打嘅人做特區第二把手。大家應該仲記得林公公處理替補機制衰到冇影，呢個同脫離民意有關，亦反映咗政府嘅所謂高官問責制，同埋擴大問責制走到掘頭巷嘞！

嗱，好心民望一樣衰到貼地嘅曾蔭權唔好再自吹自擂話個制度係集體決定，程序十分嚴謹啦，呢啲呃鬼食豆腐嘅廢話，簡直當全港市民係傻瓜！尋日高級公務員協會主席蘇平治接受電台訪問時就指出：大部分副局長同埋政治助理表現都差強人意，令人失望，幫唔到政府吸納民意，除咗個人能力問題，仲有錯配問題。所謂錯配，簡單啲舉個例，即係原本明明係教書嘅，你偏偏叫佢去搞環保，梗係搞到烏煙瘴氣，香港冇明天啦！蘇平治好明顯狠狠咁摑咗煲呔曾一大巴。

仲好笑嘅係，當局擴大問責制嘅其中一個理由，話就話培養政治人才，保安局副局長黎棟國竟然係一名已退休嘅政府高官，所謂培養人才喎 ，都唔知從何說起嘞！問責制根本就係一場有責不問嘅騙局，而所謂擴大問責制喎，即係無中生有、疊床架屋嘅政治怪胎。好心煲呔曾唔好大言不慚，死撐委任副局政助可以改善施政嘞！有學者就講得啱，大多數副局政助都係「政治插班生」，任內貢獻有限，一年白白浪費幾千萬公帑，與其嘥米飯不如扶貧好過啦！叮！

講開就真係停唔到口，呢班擴大問責制嘅政治新貴，成日畀議員插，話佢哋無論公事或私底下，好少同政黨聯絡，試問又點作為政府與政黨溝通嘅橋樑呢？唔怪得之被議員譏為不熟悉政策、不到立法會開會及不敢回答問題嘅 「三不官員」！早前仲有調查顯示，市民對佢哋認知率極低，最高嘅只有百分之一點一，部分新貴嘅認知度係零。

煲呔曾，唔好再煲冇米粥嘞！最後一份施政報告明日獻世，唔好吹水話點樣突破框架，又話自己日做十四個鐘頭；不如老老實實檢討吓呢個咁廢嘅擴大問責制，等下屆政府喺遴選問責官員時有所警惕，知道用人要公平、公正、公開仲有益有建設性啦！叮！