政壇：恒生雙馮董事局相逢

恒生銀行尋日公布委任雙馮入局，「雙馮」係指現任總經理兼財資業務及投資服務主管馮孝忠，同埋滙豐銀行香港區總裁馮婉眉，前者會做執董，後者係非執行董事。除咗大家都姓馮之外，原來兩人嘅英文名都係A字頭，果真巧合。馮婉眉洋名係Anita，馮孝忠叫Andrew，「AA」合作，一定有火花。

數數下恒生嘅董事會名單，真係女性之光。Anita入局後，恒生嘅女董事人數增至五名，恒生成個board至得十六人，以百分比計，女性嘅比例，由28%升到31%，就算未計Anita，已經係咁多間藍籌公司入面最高嘅，計埋Anita，呢個「冧巴溫」地位更加鞏固。

雙馮入局，係因為梁永祥同馬凱博先後離職，而需填補，任期均為三年。

Andrew今次入局都係大熱之選，早排梁永祥辭職唔做，市場已「貼」佢會入局。根據滙豐集團嘅薪酬政策，Andrew 擔任恒生執董將不會收取任何董事酬金。依家佢出任財資業務及投資服務主管，每年可獲總固定薪金約三百二十萬元。Anita將收取由恒生股東會議決通過之董事袍金，現時為每年三十四萬元。