政壇：搞搞政：工黨加深泛民分裂

聽日係煲呔曾喺新立法會大樓宣讀任內最後一份施政報告，而喺各政團回應施政報告嘅安排可見，泛民主派唔見得好團結。以前幾位草根派議員李卓人、KK馮檢基、梁耀忠、何秀蘭同張國柱都係一齊開記者會，但隨着工黨即將成立，今年佢哋都各自見記者。阿人、阿柱同何秀蘭三位籌組工黨嘅就走埋一齊，唔入工黨嘅阿忠同KK就被孤立，佢哋都好大方承認就係工黨同唔係工黨之別，即係劃清界線。

不過，KK仲有個搞笑位，話說人民力量陳偉業同黃毓民各自訂咗兩個分開嘅時段，而KK就夾咗喺中間。原來人民力量係想霸多啲時間講嘢，點知又唔夠手快，結果畀KK攝咗喺中間，所以人民力量要搵KK傾下可唔可以對調。人民力量不時將KK踩到地底泥咁差，唔知KK肯唔肯行呢個方便畀人民力量呢？

至於由十二名議員組成嘅工商專業聯盟，成立之初風頭一時無兩，但係佢哋就各自各開記者回應施政報告，冇晒隊形。