政壇：唐梁粉絲fb大戰

尋日喺facebook上面驚現一個支持疑似特首候選人CY梁振英參選嘅群組，群組名稱用上CY網誌標語「700萬人是一家」之餘，仲有支持CY嘅人士擔任群組成員，令成件事睇起上嚟疑幻疑真。後來我哋證實呢個群組並非CY手筆，但可以肯定有CY粉絲已經喺網上做緊工夫，令到CY同另一疑似候選人唐唐，由現實世界鬥到去網上世界。

波波謝偉俊被擺上枱

撐CY群組叫做「700萬人是一家，支持梁振英參選特首」，雖然呢個群組註明係「非官方」，但係連撐CY嘅立法會會計界議員「波波」陳茂波亦係群組成員，以及冇表態支持邊個嘅立法會旅遊界代表阿Paul謝偉俊。我哋向CY身邊嘅人求證過，原來呢個存在咗一段時間嘅群組唔係CY官方之作，之但係點解連波波都係成員就不得而知啦。

阿Paul就話對呢個群組全不知情，仲好擔心呢個群組有冇做過啲不君子行為，影響埋佢聲譽。佢又話對被人加咗入群組大惑不解，事關佢都冇表過態支持邊個，跟住仲話其實佢經常喺fb被人標籤，所以今次佢都係一笑置之。話雖如此，尋晚我哋再上群組一睇，已經唔見咗佢個名。

除上述群組外，仲有一個叫做「支持梁振英參選2012特首選舉」群組，同埋一個「全力支持梁振英做特首」專頁，當然全部唔係官方o架啦。唔單止CY，連唐唐都有粉絲為佢成立嘅fb專頁，包括一個叫做「支持唐英年競選特首」，同埋一個叫做「支持唐英年成為2012香港特別行政區行政長官」嘅專頁，不過兩個專頁都冇乜睇頭，大概只係將一啲唐唐嘅舊聞放咗上去。

須知道網絡消息流傳得好快，網民動員力都好大，所以唔知搞呢啲網頁嘅背後動機，究竟真係想撐人抑或想惡搞人？睇嚟唐唐同CY都要醒定啲嘞！