爭廁所玩殘學子 考評局佗衰香江

內地同胞來香港為搶購名牌手袋而大排長龍大家就見得多，暴發戶為搶購豪宅爭崩頭亦聽講過，大肚婆為生仔爭床位更加係時有所聞，不過，為考試而萬人齊奔爭廁所，搞到怨聲載道，各位又聽過未？

嗱嗱嗱！咁嘅奇觀，原來就發生喺機場亞洲國際博覽館。事情係咁嘅，中國人向來重視子女教育，內地父母同香港人一樣，有條件嘅都千方百計送子女去外國讀番書，名牌大學林立嘅美國梗係心頭好，而要去美國讀大學，必須參加簡稱SAT嘅學術評估測試。之不過咁，內地冇相關考場，有意赴美升讀大學嘅內地生，逼住來港報考及應試，令在港應試嘅考生人數不斷咁升。單係舊年，已有近三萬二千名考生在港應試，其中大多數為內地人。

咁多內地學生來港考試，本來係一件好事，不過問題亦隨之而來。人有三急，考試休息期間梗係要上廁所鬆鬆，丟下包袱重新上陣，如果呢個問題解決唔到，分分鐘中尿毒。偏偏考評局老爺百密一疏，冇考慮呢個最基本嘅自然呼喚問題，考場廁所設施嚴重不足。於是咯喎，一到考場休息十分鐘，千軍萬馬衝出去爭廁所，每個廁所前大排長龍，有啲人未輪到又要再上考場，嗰種難受，實不足為外人道。

香港話晒都係國際大都會，竟然連考場廁所都缺少，你話係咪失禮死人呢？講到尾又係無能政府百事哀，考評局明知今次係第一次以機場亞洲國際博覽館作為應考SAT嘅考試中心，事前應該掌握好晒啲資料o架，譬如有幾多考生、男女生比例如何，如果安排周到就唔會出現「千人奔跑為廁所」嘅奇景啦！

講開又講，既然大多數考生都係內地學生，佢哋難免有家長陪同，人數加埋成萬。好嘞，考試完畢成萬人湧住離開，會場雖設有等候區，但由於指示不清，當考生同一時間離場，在場等候嘅家長一擁而上，呼兒喚女，喊爹叫娘，秩序又混亂！有啲家長為求登高一呼，直情踩上花盆，遍地狼藉。

咁都未亂完，大批家長及考生歸心似箭又湧去港鐵買飛，搞到會場出口及港鐵月台要實施人潮管制，好彩冇發生重大意外啫。但點講都好，香港喺內地同胞面前出醜，又喺美國人面前失分，仲有乜嘢好形象吖。叮！

一場考試，竟然釀成史上最亂嘅失控場面，直情係匪夷所思！太一叮想提醒考評局老爺，認真總結教訓，切莫事件重演，即使庸官唔知醜，市民覺得好醜o架，叮！