政壇：名人冒風雨撐辛亥音樂會
唔講唔知，原來喺颱風「納沙」吹襲香港嘅星期四，中華總商會會長蔡冠深急如熱鍋上螞蟻，事關佢以家族企業新華集團名義贊助嘅辛亥革命一百周年音樂會，當晚喺尖沙咀文化中心舉行。好彩八號風球喺黃昏及時「降呢」，逾三百位嘉賓風雨不改現身撐場，蔡冠深同太太先至鬆一口氣，對天公作美不知幾咁感激。
當晚到場嘅政商界嘉賓冠蓋雲集，包括仲係以政制及內地事務局局長身份出席嘅林瑞麟，記者特登趨前叫聲「司長」，睇吓佢係咪開心到神志不清，結果佢即刻笑着糾正，話記者叫錯咗。
當晚蔡冠深全家總動員嚟撐場，囡囡Jocelyn更加落場做司儀，表現淡定大方，獲得唔少掌聲。
珠寶設計師羅啟妍（右）同大新集團主席王守業太太（左）都現身撐場。
蔡冠深夫婦（左一及二）一家七口英名文都係J字頭，認真齊心。右起：老四Jackson、老三Jesse及老二Jocelyn。