政壇：搞搞政：護鯊獲傑青黃傑龍想從政

喺尋日公布嘅新一批十大傑出青年名單當中，包括咗近年公職多多嘅叙福樓集團執董Simon黃傑龍。Simon舊年首創嘅「無翅婚宴」，大獲好評。

Simon嘅提名人係立法會議員Andrew梁君彥，兩人結緣於稻苗培植計劃畢業禮，之後Simon當上稻苗學會主席，身為職訓局主席嘅Andrew大表欣賞，靜雞雞提名佢。

甄選過程好激烈，Simon謙稱冇諗過真係獲選，家人都戥佢開心，媽媽送上Cartier手錶，平日嚴肅嘅爸爸都讚句：「你真係叻仔。」太太就送咗一對袖口鈕，等老公十二月頒獎禮時戴上。

Simon話唔少父母認為讀書不成者，先會從事飲食業，而佢今次獲獎，正好鼓勵更多年輕人入行。問到之後仲有乜環保新搞作？佢話暫時未諗到，但竟然想殺入政界。政界？咪就係想喺選委會飲食界爭一席位囉。嘩！即係爭櫈仔喇，咁就睇下佢挾着「護鯊」旗號係咪殺得入嘞？