政壇：陳兆焯潮look執教鞭
教育工作者唔一定係嚴肅保守嘅，睇吓正生書院校長陳兆焯就知喇！
曾經係千禧年傑青嘅陳兆焯，尋日以黑色外套配白色波鞋出席傑青記者會。佢話教師嘅傳統衣着，多數都係恤衫同西褲，顏色不離藍白灰黑，較為沈鬱，而佢就比較鍾情既時髦又色彩繽紛嘅衣着。佢仲話衣着品味其實係個人內心嘅反映，由於佢自己嘅性格樂觀開朗，加上獨立嘅思維，選擇衣飾嘅時候必然拒絕隨波逐流。
陳校長話早年喺加拿大求學，性格上受到開放風氣所薰陶，返港初執教鞭，當時嘅校長容許穿着新潮嚟授課，結果唔少同事都畀佢「感染」咗。
就算依家做咗校長要見家長都唔會改變自己嘅打扮，反而佢一身入時嘅衣着，好容易同家長學生打成一片，消除隔閡，溝通起嚟都容易啲喎！
青商會會長李騰駿（左）熱烈歡迎陳兆焯（中），右為馬時亨。