政壇：羅范忠告從政者走入群眾

離開官場四年嘅全國港區人大代表羅范椒芬，尋日喺大氣電波好語重心長提出忠告：「有啲官就話揸緊專線小巴，自己以前做官嗰陣就好似揸專線私家車，淨係識得直接返工放工，好少會搭的士聽取民意，同市民正面接觸」、「教改最欠缺嘅係同家長及其他持份者嘅溝通，在配套上欠缺咗家長教育」。佢又話依家政府部門做嘢往往各自為政，政策推出嘅時候，好多時都得唔到市民支持。佢話到明欣賞梁振英，對羅范嘅總結唔知梁振英有冇同感呢？

佢又話香港有好多有思想嘅人，可以畀到從政者好多有價值嘅意見，佢呼籲下屆問責團隊應該要走向前線，多啲落區同市民接觸，唔可以淨係顧自己嗰瓣。

講到兩名疑似特首候選人，手握一票嘅佢話兩人嘅差異不大，優勢未明顯，暫時未決定到支持邊個做下屆特首，但佢就好欣賞梁振英不被勸退，堅決參選嘅決心，仲盛讚佢肯出嚟選，喺歷史上已算係贏咗喎。佢又話特首選舉應該要公平、公正、公開，唔希望候選人淨係識拍膊頭拉票，又認為下屆特首唔應該淨係要爭取商界支持，要平衡各界意見，解決本港貧窮同埋經濟等深層次矛盾。

另外，立法會會計界代表陳茂波喺另一場合話，已經應承咗幫梁振英助選。而商務及經濟發展局前局長馬時亨就話，行政長官選舉有競爭係好事，又話唐英年、梁振英各有優點，誰勝誰負就要睇佢哋嘅政綱同班底喇。