政壇：維園阿哥求助嫻姐

工聯會「票后」陳婉嫻重出江湖，參加十一月區議會選舉，仲決定喺黃大仙龍上選區出選添。嫻姐呢個決定，即時令呢度變成焦點選區，人民力量執委、「維園阿哥」任亮憲同白鴿黨林偉基早排亦報名，擺明係為狙擊嫻姐而嚟，本來各有各做冇乜所謂，點知任亮憲上星期做街站時無厘頭畀人打，雖然即時報警，但三個施襲者中有兩個仍然逍遙法外，佢尋日到黃大仙警署遞請願信，要求警方加緊緝兇。

證據交警方仍未拉人

事發至今已經一個星期，任亮憲早就將現場拍低嘅影片交畀警方，所以極之唔明白點解警方有晒證據都仲未捉到人。佢又透露，前日收到有心人報料電郵，將其中一名施襲者嘅姓名、地址都畀晒佢，據講呢位兇徒係黃大仙上邨某座樓嘅互助委員會委員。佢尋日已經將呢啲資料畀晒警方，希望警方今次真係做到嘢。

落區宣傳畀人打，任亮憲依家落區都一定有義工陪，依家仍舊會每日去黃大仙宣傳。佢仲話，前日落區嗰陣，咁啱又撞到其中一位施襲者，雖然即時報警，但警察隔成二十分鐘先嚟到，結果又畀人走咗。講到咁，佢即係話班警察冇效率喇！去完警署，佢再去到工聯會黃大仙地區服務處遞信，促請工聯會幫手遏制暴力事件。佢話施襲者喺言談間，表露到係嫻姐支持者，所以希望嫻姐發揮影響力，將兇徒繩之於法。

呢次行動仲有一段小插曲，話說任亮憲將請願信插喺工聯會門口後走人，點知經過工聯會塊布告板時，竟發現貼住幾張時薪唔夠二十八蚊嘅招聘啟事，任即時取笑，話工聯會唔撐最低工資。