無謂吹水唔抹嘴 派錢紓困最實際

時間過得好快，眨吓眼又到十月，即係話，施政報告就快出爐。本來呢，夕陽政府等收工，大家都冇乜期望嘅喇，好笑嘅係煲呔曾吹水唔抹嘴，聲稱會喺佢最後一份施政報告中提出切實可行方案，處理市民最關心嘅房屋、貧富懸殊及人口老化等問題喎，你信唔信吖？

平時唔燒香，臨急抱佛腳，有用咩？回歸以來港府一事無成，最叻就係添煩添亂，卒之窮人增至一百二十幾萬，仲增加咗一大堆深層次矛盾，民怨更去到臨界點添。夕陽政府剩番幾個月貨仔，臨收工先至話要處理呢樣解決嗰樣，遲唔遲啲吖！

呢，大家只要睇吓民望超低嘅林公公林瑞麟竟然可以升官發財，成為一人之下萬人之上嘅政務司司長，就知道呢個視民望如浮雲嘅政府淨係識得為自己友謀利益，根本唔會關心市民需要乜。所以咯喎，煲呔曾講人自講，吹者自吹，信佢一成，雙目失明。

正所謂，性格決定命運。煲呔曾剛愎自用，任人唯親，藉擴大問責制搞出副局長同政治助理呢啲政治怪胎，結果只換來「倒錢落海」亂花公帑嘅惡名，而副局長就成為可有可無嘅閒職，就算出缺都唔使搵人替補，你話香港人有乜辦法唔悲哀吖，叮！

講到呢度，太一叮想同大家講個有關平衡嘅常識。喺一片草原上，生活着一群羊同埋一群狼，如果狼太多會點呢？唔使問阿貴，狼首先會食咗羊，跟住就襲擊牧民；相反如果羊太多，又會食晒所有草，最後唔只羊冇嘢食，連人都會失去生存環境。所以如果唔識保持狼、羊、草之間嘅生態平衡，就會好大鑊喇。

同樣道理，香港之所以烏煙瘴氣，七國咁亂，就係因為社會上好多嘢唔平衡，唔公平。嗱，社會財富側埋一邊，貧富懸殊不斷惡化，加上無能政府施政混亂，無良政客搞風搞雨，政治爭拗無日無之，司法覆核沒完沒了，喺咁嘅情況下，點可能唔民怨沸騰吖？香港明天又點會更好吖？

講多無謂，食多會滯，煲呔曾落雨收柴，無謂死要面子再吹水喇，乜嘢六大產業、十大基建、金融中心等等，收皮罷喇。家陣衣食住行樣樣貴，通脹如虎，民生多艱，港府坐擁金山銀山，窮到只剩下錢，與其車埋啲無煙大炮，不如做番啲實事，開倉派米，還富於民，紓解民困，咁仲實際喇，叮！