CULTURE噏：90後魔界男女

近期電視的魔術節目大受歡迎，令魔術成為城中熱話，吸引大批90後參與。部分更非「玩玩吓」，他們參加比賽，甚至獲邀到商場表演。資深魔術師指出，玩魔術能令年輕人鎖定興趣，建立自信；而魔術年輕化，與網絡普及，在網上容易找到教魔術的短片有關。

這次找來兩位曾經獲獎的90後魔術愛好者，分享看法。

阿龍：我嘅魔術技巧係自學得嚟，我喺網上搜尋教魔術短片，然後對住鏡不斷練習，再表演畀細佬妹睇。最初屋企人覺得玩魔術好奢侈，都有啲反對，我唔想用屋企人嘅錢，就趁暑假做兼職賺錢，買魔術道具。依家間中會接商場嘅表演工作，屋企人見我咁投入，都冇再反對。

Cherish：初時見魔術流行，諗住學多門手藝，就開始上網睇片學吓點玩。魔術易學難精，所以要多練習，好彩第一次參加魔術比賽就贏咗，我會繼續學落去。

Eddy：以前學魔術都要拜師學藝，不過依家網絡咁發達，網上有好多教魔術嘅短片，好多地方有魔術工具賣，年輕人容易接觸到，令魔術唔再係高不可攀，所以愈來愈多年輕人玩魔術。

阿龍：一個成功的魔術，最緊要同觀眾有眼神交流，仲要設計特別對白吸引觀眾，所以玩咗魔術後，令我學識點樣表達自己，以前我個人比較靜，唔係好識交際，依家就多嘢講咗好多。

Cherish：我係模特兒，鍾意表演，而學識魔術可以表演畀朋友睇，氹到人哋開心之餘，又可以多咗話題，自己仲好有滿足感，好開心！

Eddy：依家社會競爭激烈咗，好多年輕人都覺得自己「高不成、低不就」，對前路感到徬徨，玩魔術就可令佢哋尋回自信心。近年，魔術愈嚟愈受到社會認同，唔再被人認為係江湖賣藝，所以多咗好多年輕人玩魔術，興趣之餘，亦可一技傍身。